Նպատակներն ու ելակետերը
Երևանի քաղաքապետարանի հետ կնքված պայմանագրի հիման վրա, և Ամերիկայի Միացյալ Նահանգների Միջազգային զարգացման գործակալության (ԱՄՆՄԶԳ) Արտասահմանում ամերիկյան համալսարանների և հիվանդանոցների (ԱԱԴՀ) գրասենյակի ֆինանսական աջակցությամբ, ՀԱՀ-ը նախատեսում է բարելավել Եռանկյունաձև զբոսայգին` դարձնելով այն կանաչապատ, բացօթյա և կայուն հանրային տարածք, որտեղ բոլորն, առանց տարիքային սահմանափակման, կկարողանան հանգստանալ, խաղալ և ուսանել:
Այժմ այգին ակտիվորեն օգտագործվում է թաղամասի բնակիչների և ՀԱՀ-ի ուսանողների կողմից, սակայն թերի է որակային առումով, չի ապահովում անհրաժեշտ միջավայր և ունի հավելյալ խնամքի կարիք: 2020 թվականին ՀԱՀ-ի ուսանողները ծավալուն ուսումնասիրություն կատարեցին՝ հավաքելով և վերլուծելով բնակիչների հետ անցկացված հարցման արդյունքները, ծանոթանալով նրանց գաղափարներին «Շահագրգիռ կողմերի ներգրավման գործընթաց»-ի շրջանակներում: Այդ ուսումնասիրության արդյունքները հիմք հանդիսացան Եռանկյունաձև այգու դիզայնի գաղափարի ստեղծման գործընթացի համար: Արդյունքում, սահմանվեցին հայեցակարգ ձևավորող տասը ելակետեր:
Դիզայնի գաղափարի ձևավորում
Կա մեծ պոտենցիալ ներկայիս այգին վերակենդանացնելու և զարգացնելու, աշխույժ և կանաչապատ հանդիպման վայր դարձնելու ինչպես համալսարանի, այնպես էլ հարակից տարածքի բնակիչների համար:
Դիզայնի նախագծի առաջնային մարտահրավերներից մեկը մակերեսի բարձրության նկատելի տարբերություններն են: Այգին տեղակայված է զառիթափ լանջի վրա, ինչը դժվարացնում է հետիոտնի շարժը, ունի բավականին միօրինակ դիզայն, առկա է նաև էրոզիայի ու ջրի խնդիր: Նոր նախագիծը նախատեսում է վերածել լանջը տեռասաձև լանդշաֆտի, որը կծառայի որպես այգի տանող հարմարավետ և բարձրորակ օձաձև արահետ: Բացի այդ, տեռասները տարածք կստեղծեն բույսերի բազմազան տեսակներ, նոր ծառեր տնկելու համար, ինչպես նաև հնարավոր կլինի օգտագործել բազմաթիվ խաղեր կազմակերպելու և սպորտով զբաղվելու համար: Այգում օգտագործվող բոլոր նյութերը լինելու են տեղական հումքից, և առողջ ծառերը հնարավորինս պահպանվելու են: Ջուրը կհոսի տեռասներն ի վար և կհավաքվի կրկնակի օգտագործման նպատակով, իսկ դրա կողքին առկա ջրային կառույցն ամռանը կզովացնի տարածքը և երեխաների համար որպես խաղահրապարակ կծառայի:
Դիզայնը ներառում է նաև ստորգետնյա մարզասրահի նախագիծ: Այն ամբողջովին ներկառուցված կլինի այգու տեռասներին և տեսանելի կլինի միայն հարավային կողմից, որտեղ կլինի մարզասրահի էվակուացիոն ելքը:
Գործընթացն ու պլանավորումը
2020 թվականի մարտին նախագծողների թիմը և ՀԱՀ-ը սկսեցին իրենց առաջին հանդիպումները դիզայնի գաղափարի ձևավորման շուրջ: Այս շաբաթվա ընթացքում նախագիծը փորձարկվեց նաև տեղում. ծառերը և հողը ուսումնասիրվեցին, բարձրության մակարդակները ստուգելու համար փորձարկվեց արահետային նոր ճանապարհներ:
Այժմ հարակից տարածքի բնակիչները, ՀԱՀ-ի ուսանողները և այլ շահագրգիռ կողմեր հնարավորություն ունեն դիզայնի վերաբերյալ հայտնելու իրենց կարծիքը:
Ի՞նչ կարծիք ունեք դիզայնի վերաբերյալ:
Այցելե՜ք https://park.aua.am/ կամ սկանավորե՜ք QR կոդը և կիսե՜ք մեզ հետ ձեր կարծիքը: Կարող եք ներկայացնել ձեր գաղափարներները, ցանկություններն ու դիտողությունները կայքի միջոցով կամ ուղարկելով նամակ [email protected] էլ. փոստին: